TEXT: The Terrifying Adventure.3

[Jorge LLambias <jorge@PHYAST.PITT.EDU>]

Here is version 3. I incorporated many of Nick's suggestions and
sprinkled a few more attitudinals. There's still lots of room for further
improvement, and some of the phrases that Nick found doubtful are still
there, until I find better alternatives.

co'o mi'e xorxes

--------------------------------------------------------------------------

  bimo'o prosa le zabna fasnu po'u le nu la donkixotes bifymlo ke se
  terpa lifri noi pu noroi co'a se pensi
ije go'i le termojyxau fasnu noi drata

  no'i la donkixotes goi ko'a e la santcopansas goi ko'e zatfa'i fo'a
  goi cinoji'ivono bifymlo be va le srasu foldi
i ca le nu ko'a fo'a co'a viska cu cusku fi le ko'a xacysantyse'u fe lu
          be'ucu'i le su'u le dimri'a ca'o gidva le mi'o cuntu cu zabna
          zmadu le mi'o pu'i se pacna
        i do viska doi pendo po'u la santcos le va su'ocino cilce
          brabracrida poi te facki zi'eno'u le pu'o se damba be mi
        ije go'i le se caurgau be mi bei le ka jmive
        ije go'i le te vimcu be fo le mi'o co'a se ricfu
        i le nu jamna le go'i cu vrude
        i xamgu selfu le cevni le nu vimcu le palci tsiju le terdi sefta
        li'u
i ko'e cusku lu
          ma brabracrida
        li'u
i le ko'e selse'u ko'e spuda lu
          ju'aju'o do viska le go'i noi birka clani
        i ca'a se kampu le ka le ri so'o birka cu ki'otre piso'a li re
        li'u
i ko'e ko'a spuda lu
          ju'i doi nobli le va simsa goi fo'a brabracrida nagi'e bifymlo
        i le fo'a simsa be lo birka cu balre le molki
        i le go'i ca le nu ca'o se catke le brife cu gasnu le nu le
          molki rokci cu carna
        li'u
i ko'a ko'e spuda lu
          za'ali'a do na certu le ve capli'u
        i fo'a brabracrida ju'o
        i i'ecu'i dai.e'enai do terpa
        i seki'ubo ai.e'u ko sezmu'u fi ta
        i ko jdasku ca le nu mi fo'a damba co cilce je na'e prolanxe
        li'u
i ca le nu ca'o cusku di'u kei ko'a jafti'e minde le xirma po'u la
  rosinantes
i na'e jundi le ko'e krixa kajde be fi le nu le pu'o se gunta cu bifymlo
  gi'enai brabracrida
i ko'a birti le du'u fo'a brabracrida
i seja'ebo na'e tirna le ko'e voksa gi'e na'e viska le ca'a me fo'a
  ki'unai le nu vi zvati fo'a
i ca'o cladu cusku lu
          le'o ko na rivbi fi'inai tolvri je palci danlu
        i su'epa le nobli do gunta
        li'u
i co'a brife ca le nu co'u go'i
i le barda balre co'a carna
i ko'a seri'i le nu viska le nu go'i cu cusku lu
          e'unai mi do pu'o sfasa ki'unai le nu do muvdu le birka noi
          lairdu'i zo'e pe le brabracrida po'u la briareos
        li'u
i ca le nu ba'o cusku di'u kei ko'a sezpevdu'a le ko'a fetno'i po'u la
  dulsineas gi'e pikci ri le nu sidju sera'a le ca ckape
i le xacysanta ca'o marbi ko'a
ije le claxa'i cu bredi
i ko'a fo'a co'a klama
i ko'a gunta le ca'u pamoi be le molki
i ko'a darxi le molki le xarci le balre noi tsali se muvdu le brife
  ja'e le nu po'irgau le xarci gi'e falgau le xirma e le xirselma'erno'i
  noi carna re'o le foldi
i ko'e ko'a fu le xasli cu klama co sutra be du'i le ni ri ka'e no'a
i ca le nu ba'o klama kei ko'e facki le du'u ko'a na'e ka'e sezmu'u
i la santcos cusku lu
          a'o.e'o le cevni mi'o uu bandu
        i ju'o mi le mi nobli pu cusku le du'u ri ei traji pensi le nu zukte
        i go'i fi le du'u fo'a ca'a bifymlo noi ka'e na'e se djuno le po'o
          se stedu co vasru be la'e fo'a
        li'u
i la donkixotes ko'e spuda lu
          ko smaji doi pendo po'u la santcos
        i ka'u le jamna cuntu ka'e binxo semau ro le drata
        i uecu'i le prije po'u la frestOn noi zerle'a o'onai le mi kumfa e
          le cukta cu galfi le brabracrida le molki sezu'e le nu mi claxu
          le nu jinga fi fo'a
        i le go'i mi bradi
        i ba'aju'opa'e le tolka'erselylacri je palci ba na'e snada le nu
          fapro le mi dakyxa'i vrude
        li'u
i la santcopansas spuda fi lu
          ba fasnu du'o le cevni
        li'u
i ko'e ko'a sidju le nu co'a sanli gi'e xirma cpare la rosinantes noi
  milxe spofu
i li'oli'o